იყო ერთი ცალთვალა მეფე. ჰყავდა ერთი სახელოვანი მხატვარი. მეფეს უნდოდა ამ მხატვრისთვის რამე მიზეზი ეპოვნა და უბრძანა:
- ჩემი სახე უნდა დახატო!

მხატვარმა იფიქრა: ახლა კი მოვიდა ჩემი უკანასკნელი დღე, ბრმა რომ დავხატო, მომკლავს – როგორ მაკადრეო, ორი თვალით დავხატო და თავს მომჭრის, როდის არის ჩემი მსგავსიო.

იფიქრა მხატვარმა და ეს ხერხი მოიფიქრა: დახატა ირემი, მეფეს ხელში თოფი დააჭერინა, ბრმა თვალი დაუხუჭა და თოფი ირემს დაამიზნებინა. ნახატი მეფეს მიართვა.

მეფემ მიზეზი ვერაფერი უპოვა და ასე გადარჩა მხატვარი.