ჩიპოლინოს თავგადასავალი (ნაწყვეტი #10)
ალ’უბალა ავად გახდა - ისე აკანკალებდა, რომ ფანჯრებიც კი ზრიალებდა. ბოდვაში განუწყვეტლივ იძახდა:
- ჩიპოლინო! ჩიპოლინო!
პომიდორმა იფიქრა, რომ ბიჭი ახლომახლო გამოჩენილმა დამნაშავემ შეაშინა.
- ხვალ დავაპატიმრებ! — უთხრა ავადმყოფს სანუგეშოდ.
- არა, არა! ძალიან გთხოვთ! არ დააპატიმროთ ჩიპოლინო! მე დამაპატიმრეთ და ყველაზე ბნელ დილეგში ჩამაგდეთ. ოღონდ ჩიპოლინოს ნუ დააპატიმრეთ. ჩიპოლინო კეთილია. ჩიპოლინო ჩემი ერთადერთი მეგობარია!
დონ ომბალომ ცხვირი მოიხოცა:
- ბოდავს! ძალიან, ძალიან მძიმე შემთხვევაა.
ექიმმა წაბლიანომ ყურადღებით გამოიკვლია ავადმყოფი: უნახა ენა და თვალის გუგები, გაუსინჯა მაჯა, დაბალი ხმით რამდენიმე შეკითხვა დაუსვა, მერე ხელები დაიბანა და ესღა თქვა:
- სახიფათოდ სნეულია, ვინც სულ მუდამ ეულია.
- მაგით რა გსურთ შთაგვაგონოთ? — მკაცრად იკითხა პომიდორმა.
- მე არაფერს არ შთაგაგონებთ... უბრალოდ, სიმართლეს ვამბობ, თუ სიმართლის მოსმენა გინდათ. ამ ბავშვს არაფერი სჭირს, მხოლოდ ცოტაოდენი მელანქოლია. ეს სევდაა, მწუხარება. ბავშვს მეგობრები სჭირდება. რატომ არ გაუშვებთ ხოლმე სხვა ბავშვებთან სათამაშოდ?